Inspirasie kom in verskillende vorme, nie net uit goeie ervarings nie, maar soms ook uit teleurstelling. Die wete dat jy moet verander en aanbeweeg omdat 'n situasie nie meer gesond is vir jou nie. En dan moet jy gaan soek om weer waarde te kry, positief wees oor die onsekerheid wat wag in die toekoms. Dat dinge sal uitwerk soos dit moet, maar jy moet vertrou en jou deel doen om dit te maak werk. 
 
Ek spandeer baie tyd aanlyn op die internet en het onlangs sosiale media ook begin 'beloer' om te kyk of ek daar sal inpas. Dis nogal oorweldigend om die minste te sê en jouself vir die wêreld te wys, en ek raak nog gewoond daaraan. 'Gesigloos' kan seker ook werk, maar soms moet jy jouself blootlê om op sekere platvorms iets te kan lees of opsoek. 
Op soek na die inspirasie om die dag aan te pak of net 'af te pak' en te weet dit is okay om inspirasie en moed te gaan soek om weer kreatief te wees soos 'n kind wat geen sorge of bekommernisse het nie. My gunsteling? Verseker Pinterest, ek kan verlore raak in die tyd wat ek daaraan spandeer om mooi gesegdes, stories, resepte, oefenmetodes of kuns te lees. Miljoene mense se idees, als op een plek. Ek moedig jou aan om ook by Pinterest aan te sluit vir 'n hupstoot in gemoed en inspirasie, as jy nog nie het nie. En hou maar die tyd dop, want dis is nogal verslawend!